دليلك الكامل لملتقى التوظيف: إزاي تحضّر، وتتكلم مع الشركات، وتطلع بفرصة شغل او تدريب!
استفيد أكتر من ملتقى التوظيف الجاي بنصايحنا عشان تبان وسط الزحمة.
رايح ملتقى توظيف وحاسس إنك هتتوه؟ زحمة، وبوثات كتير، ووقت قليل، ومش عارف تعمل إيه عشان تبان وسط الناس. متقلقش، إحنا معاك. الدليل ده هيمشي معاك خطوة بخطوة: من التحضير، للانطباع الكويس، لحد المتابعة بعد ما الملتقى يخلص.
يعني إيه ملتقى توظيف؟
ملتقى التوظيف (أو Career Fair / Job Fair) هو حدث بتيجي فيه شركات للجامعة عشان تقابل الطلبة. الشركات بتعرّف نفسها وبتتكلم عن الفرص اللي عندها، وبتدوّر على متدربين وخريجين ممكن تشغّلهم بعدين.
غالبًا بينظمها مكتب التوظيف أو الخريجين في الجامعة، أو أسر وكيانات طلابية. وبتتعمل عادةً في أول كل ترم.
هل يستاهل تروح؟
أيوه طبعًا، ومش بس عشان الهدايا والبوكسات المجانية.
لو عينك على شركات معينة:
- تشوف الشركة على الطبيعة: قبل ما تتعب نفسك في التقديم، اتكلم معاهم وشوف الجو مناسبك ولا لأ.
- تقابلهم وش لوش: معظم التقديم بقى أونلاين، فدي فرصة نادرة يشوفوك إنت مش بس السي في بتاعك. ولو سبت انطباع حلو، ممكن يجيلك تدريب أو شغل بعدين.
- تسأل كل أسئلتك: أي حاجة عايز تعرفها عن الشركة، اسألها من المصدر مباشرة.
لو لسه بتستكشف:
- هتعمل السي في cv
- هتدرّب نفسك على النتوورك: الكلية مش بتعلمك تتكلم في جو مهني، فخلي الملتقى ساحة التمرين بتاعتك.
- تمرين ببلاش على الإنترفيو: إنك تتكلم مع حد من HR وإنت متوتر هو نفس إحساس الإنترفيو، فاعتبرها بروفة.
وخلي بالك إن ملتقيات التوظيف بتفيد الطلبة والخريجين الجداد أكتر من أي حد تاني، فاستغلها وإنت لسه في الفترة دي.
إزاي تطلع بأكبر استفادة من الملتقى؟
دي أهم 5 نصايح عشان تكسّر الدنيا في الملتقى الجاي.
1. ذاكر الشركات قبلها
دي تقريبًا أضمن طريقة تخليك مختلف، لأن أغلب الناس مش بيعملوها. بيروحوا للبوث ويسألوا "إنتوا بتعملوا إيه؟" أو "عندكم شغل إيه ليا؟". المعلومات دي بقت على بعد سيرش واحد، فالسؤال ده بيوصل إنك مش مهتم أصلًا.
شوف الشركات اللي جاية الملتقى واختار اللي عايز تقابلهم. ادخل على مواقعهم وصفحاتهم، واعرف بيعملوا إيه وليه عايز تشتغل معاهم. وتقدر كمان تشوف على تدريبك مين فيهم عنده فرص تدريب أو شغل مفتوحة دلوقتي.
وخلي بالك إن في شركات بتيجي الملتقى عشان البراندنج والدعاية بس، مش عشان تعيّن. فلو وقتك قليل وهدفك تلاقي تدريب أو شغل، ركّز على الشركات اللي بتعيّن فعلًا.
2. روح بدري
مع الوقت، الناس اللي في البوثات صوتهم بيروح وحماسهم بيقل، وده طبيعي. فكل ما تروح بدري، كل ما يكون أحسن.
3. استمتع بالكلام
في الملتقيات، الطلبة بيبقوا متوترين لدرجة إنهم مش عارفين يتكلموا عادي. فأسهل طريقة تبان بيها إنك تبقى على طبيعتك. اتكلم مع اللي في البوث كأنك بتكلم والد صاحبك: باحترام بس من غير تكلّف.
في الوظايف الأولى، الشركات بتسأل نفسها: "ينفع أشتغل مع الشخص ده كل يوم؟". فركّز إنك تعمل حوار حقيقي، وده اللي هيفتكروك بيه، أكتر من الكلام المحفوظ اللي سمعوه من كل الطلبة.
ولو مش متعود تتكلم مع ناس غريبة (يعني النتوورك)، الملتقى فرصتك تتمرن.
4. قابل شركات مش في ليستتك
أسهل إنك تبان لما مفيش منافسة. روح للبوثات اللي مفيش عليها زحمة، يمكن تلاقي فرصة حلوة مكنتش متوقعها.
ولو متوتر، الشركات دي أحسن مكان تسخّن فيه. اتكلم معاهم الأول لحد ما تاخد على الجو وتبقى على طبيعتك، وبعدين روح للشركات اللي في أول ليستتك.
5. تابع معاهم بعد الملتقى
لو قعدت قعدة حلوة مع شركة ومتابعتش بعدها، غالبًا هينسوك وسط مئات الناس اللي اتكلموا معاهم في نفس اليوم. لكن لو خدت 5 دقايق وبعتلهم شكر، هتفرق عن غيرك جدًا.
ابعت رسالة شكر لكل حد قابلته، سواء بالإيميل أو على لينكدإن مع طلب كونكت. كده هتبان إنك شخص بيعرف يتواصل، وطموح، وعنده مبادرة، ودي من أكتر الصفات اللي الشركات بتدوّر عليها.
وللناس اللي كان كلامك معاهم مميز، زوّد شوية: افكرهم بحاجة اتكلمتوا فيها. مثلًا لو حكيتلهم عن موقع عملته، ابعتلهم اللينك بتاعه.
تقول إيه للشركات في الملتقى؟ (سكريبتات جاهزة)
لما تقرّب من البوث
دي الخلطة اللي تمشي عليها:
- عرّف نفسك.
- قول ليه مهتم بالشركة أو بوظيفة معينة فيها.
- اذكر مهارة أو خبرة ليها علاقة.
- اسأل سؤال ذكي إجابته مش موجودة على موقعهم.
يلا نشوفها على أرض الواقع.
طالب تجارة مهتم بالماركتنج:
أنا أحمد، في آخر سنة تجارة. بتابع [اسم الشركة] من فترة، ومهتم جدًا بوظايف الماركتنج للخريجين الجداد. اشتغلت في التدريب بتاعي على حملات تسويق معتمدة على الداتا. ممكن تحكيلي يوم خريج الماركتنج عندكم بيبقى عامل إزاي؟
طالبة آداب علم نفس مهتمة بالـ HR:
أهلًا! أنا سلمى، في آخر سنة علم نفس. تدريب الـ HR عندكم شدني جدًا، لأنه قريب من اهتمامي بعلم النفس في بيئة الشغل وراحة الموظفين. ممكن أعرف إيه المهارات والصفات اللي بتدوّروا عليها في المتدرب المثالي؟
طالب حاسبات مهتم بالأمن السيبراني:
أهلًا، أنا يوسف، في آخر سنة حاسبات ومعلومات، ومهتم جدًا بالأمن السيبراني. بتابع شغل [اسم الشركة] في المجال ده من فترة وبيلهمني. أنا مهتم بالذات بإزاي الذكاء الاصطناعي ممكن يقوّي الحماية. ده حاجة بتشتغلوا عليها؟
رسالة المتابعة بعد الملتقى
أهلًا أستاذ/ة [الاسم]،
أنا [اسمك]، وكان لطيف جدًا كلامنا امبارح في ملتقى التوظيف بـ[اسم الجامعة].
استفدت كتير من كلامنا عن [الموضوع اللي اتكلمتوا فيه]، وأكيد حابب أشتغل في [اسم الشركة] كـ[المسمى الوظيفي].
زي ما اتفقنا، مرفق السي في بتاعي. هقدّم أول ما التقديم يفتح، وإن شاء الله نتقابل تاني.
مع خالص التحية، [اسمك]
ملحوظة: الرسالة الرسمية دي الأفضل تتكتب بلغة مهذبة شوية زي ما هي، أو بالإنجليزي لو الشركة بتتعامل بيه.
لو مش هتقدر تحضر الملتقى بنفسك
في شركات كتير بتشارك في ملتقيات توظيف أونلاين، فدوّر عليها. ودي أهم النصايح ليها:
- البس كويس: البس لبس رسمي حتى لو اللي باين نص جسمك اللي فوق بس. لما تبقى لابس كويس، ثقتك في نفسك بتبان. والترنج مش هينفع.
- اختار خلفية بسيطة: سواء حقيقية أو فيرتشوال، خليها هادية ومن غير حاجات تشتت. عايز الشركة تركز معاك، مش مع الكركبة اللي وراك.
- التزم بأصول مكالمات الفيديو: بص في عدسة الكاميرا عشان تحسسهم إنك باصص في عينهم. اقفل صوت الموبايل والهزاز، واقعد في مكان هادي مفيهوش دوشة.
- احضر البرزنتيشنز والورش: لو الشركات عاملة عروض أو ورش أونلاين، احضرها. هتعرف منها حاجات مهمة عن ثقافة الشركة والفرص المتاحة وأخبار المجال.
الخلاصة
ملتقى التوظيف فرصة، بس اللي بيفرق هو التحضير. ذاكر الشركات، وروح بدري، واتكلم على طبيعتك، ومتنساش رسالة المتابعة. وتابع تدريبك عشان تعرف مواعيد الملتقيات وفرص التدريب أول بأول. بالتوفيق!